Luk 14 | MMX | STEP | At lara laaleng kaala Iesu gat pas kusu na anan at leluxa ro at loogu at lara lamgomgo at lubung Parisi; la luvuttadi loklox ase at Lenavolo diga reven pilo ne Iesu; mo do neni na lox aroo taradi at laaleng kaala, diba lok li i at lavapaase.

Luke 14

Iesu Ga Lox Aroo Laradi Ga Meres

1 At lara laaleng kaala Iesu gat pas kusu na anan at leluxa ro at loogu at lara lamgomgo at lubung Parisi; la luvuttadi loklox ase at Lenavolo diga reven pilo ne Iesu; mo do neni na lox aroo taradi at laaleng kaala, diba lok li i at lavapaase. 2 Lara laradi luxangkedek teren mi lukngen ga dang, ga vot pasa ne Iesu; 3 la ne Iesu ga sue di eburu mi lubung Parisi xeretna, “Kereva, Lenavolo atdik i tong i do i epovo ri lox aroo limixin at laaleng kaala kopla xopmen?” 4 Ketla di goxo vorang levelinga at ne Iesu. Iesu ga lok ka mo laradi ga meres, la ga lox aroo i, la ga riki aonon i.

5 La ne Iesu ga lok tidi, “Mo do tara atnimi i ruuna tamdak kopla tavatbulumaxao la i subu tup uto at lamamara at laaleng kaala; kereva, ixo epovo xusu mina rep aurut ka i at laaleng kaala?” 6 Ketla di goxo epovo xusu dina vorang levelinga ren.

7 Iesu ga long lenger i do lentaba lavaose diga xis at lengkot nunuan; kuren la neni ga vaase poovo mu i na loklok tinedi axap. Iesu ga lok keretna, 8 “Dola taradi na lam kaka u uto at loklox epot, nemen utat kis to at lengkot nunuan. Lavanga tara gove i silok tu digara lam kaka vam i, 9 la laradi gomgo at leluxa naba vot la na lok tu, ‘Nemen utat kis at na loxot.’ La kerepmo uba mangan, la diba lok kaka u la una xis to at lisigege. 10 Dola tara na xup ka u uto at leluxa, unat pas la una xis to at lisigege, kusu nom laradi at leluxa naba vot la na lok tu xeretna, ‘Ude vana u, lentangas tarak, uto u at loxot kitkis avukat.’ Anai ba lox u la dina lok ngangao ram to melamgo atnedi lavaose. 11 Lavasuun at na lavapaase poovo i lok keretna; do nege i lox asilox i, ne Moroa ba lox alixilix i, la do nege i lox alixilix i, ne Moroa ba lox asilox i.”

12 La ne Iesu ga lok ti mo laradi ga lam kaka i uto ap mo leluxa, “Mo do una lok teluxa kanangking kopla ukantinao, nemen uta lam kaka larapen tangas taram, kopla luvutnetam kopla lentaba at libibinat taram, kopla nedi dipnovos di nemen saparav u, mila diba vorang amlong i ru, la at na langas mun uba xip kaka luunun taram ti mo lavanga uga lox i. 13 Mo do una lok leluxa, una lam kaka limixin banbalo, limixin levenantuno di i kauk, limixin labantuxu atdi i molo, la limixin katli main; 14 la ne Moroa naba lox anarong u, mila kopmen dina epovo xusu dina vorang lempanga ram. Ketla ne Moroa axa naba raba u mi luunun at laaleng limixin mokmokso diba xatu kaxat basinge lanmet.”

Lavapaase Poovo Ri Leluxa

(Mt 22:1-10)

15 Lara laradi gat kis to at laanan ga ronga i na la ga lok ti ne Iesu, “Luvukat tinedi no dibat kis at leluxa silok to xeneng at Linintoo at ne Moroa.”

16 Iesu ga tong lavapaase poovo rin, “Lara laradi ga lok leluxa silok, la ni ga xup kaka buaang limixin. 17 Ap mo laaleng ti leluxa, neni ga riki lasaxaruki ren kusu na tong i ri limixin do, ‘Ude nimi, lempanga axap ira gagas pam!’

18 Ketla nedi axap diga tong i rin do kopmen di noxot pas ti mo leluxa. Lara avot ga lok ti nom lasaxaruki, ‘A un ka loxongkangka, la anat pas kusu ana ven be i; una ke be ia.’

19 Lara bok ga lok, ‘A un ka lasangaun lempat bulumaxao la anat pas na xusu ana lok tong pen di ri lok lugugu. A sing u xusu una ke be ia.’

20 Leta vetpes bok ga lok, ‘Ana vam nia epot, la at na mun lavasuun teren la nia noxot pas ti leluxa.’

21 Lasaxaruki gamlong la ga tong axap na lempanga ti leeme gomgo ren. La leeme gomgo ap mo loogu ga musak teng tinotno la ga lok ti lasaxaruki ren, ‘Soso mene nga u, unat pas uto at larangas silok la uto at lengkonnga lixilik bok, la una lok kaka limixin banbalo, limixin levenantuno atdi i kauk la lengkatli main, la luvuttadi labantuxu atdi i molo.’

22 La lasaxaruki ga lox i xuren la ga lok ti leeme gomgo xeretna, ‘Levelinga ram ara lox epovo vam i, ketla lengkonnin angavang nave ri teventaba.’

23 La leeme gomgo ga lok ti lasaxaruki, ‘Unat pas uto at larangas at na lenep silok la at levenngas to at laxairing la una lok kaka limixin ude xeneng, kusu loogu rak naba umsu. 24 A tong i rinimi axap do kopmen teta atdi nom limixin, nia aga xup kaka avot di ri leluxa, diba anan at leluxa rak.”

Loklok At Laradi Loklok Ka Anasa At Ne Iesu

(Mt 10:37-38)

25 Buaang nedi limixin diga emu eburu mi ne Iesu. La neni ga rem gili la ga lok tinedi. 26 Dola tara i vara i xusu na mumu asu ia la ni xopmen na doma asilox ia at ne temen la nenen la latkin teren la laxamdak mi luvutneton la luvurinen, la lorooro axa ren, neni xopmen na epovo xusu neni laradi loklok ka anasa rak. 27 Do nege xopmen na mulus kusu nap kip levenmumuat silok aleng la na mumu asu ia, neni xopmen na epovo xusu neni laradi loklok ka anasa rak.

28 Mo do tara atnimi i doxoma i do na xip toogu, neni na xis la na lox asu be luunun, do i epovo ri lox axap mo loogu. 29 Mo do ixo lox asu avukat luunun at loogu, la neni xopmen na epovo ri lox axap mo loogu, neni ia vaxaru vam laraxem teren, limixin petpes diba ven i la dibak lok kalise i. 30 Diba lok, ‘Na laradi ga vaxaru kaxat na loogu, ketla neni xopmen na epovo ri lox axav i!’

31 Mo do toorong silok i gagas mi legesa sangaun larabin sangsangaun kobot (10,000) limixin teren kusu diba esep mi lara loorong silok, neni i ruuna legepu sangaun larabin sangsangaun kobot (20,000), neni na xis be la na doma mu i do kereva neni i epovo lolos kusu na esep mi mo lara loorong silok kopla xopmen. 32 Mo do xopmen, neni naba riki taradi kusu na ekip tangarang mi nom loorong silok, dola neni move i nemen paxalom, kusu ba sing ti lok lumulum.” 33 La ne Iesu ga lok, “Lavasuun at nai lempapaase poovo keretna; dola tara xopmen na ke xepe axap lempanga ren, neni kopmen na epovo xusu neni laradi loklok ka anasa rak.

Loxong Kakures I Ru Katling Limixin Nuunu

(Mt 5:13; Mk 9:50)

34 La ne Iesu ga lok bok tidi, “Laxakures neni lavanga avukat, ket do lololos teren na xap, kopmen bok ba tangas kusu diba lox i la na so xakures manga. 35 Laxakures i lok kapmek pam, kopmen na epovo ri laxangka kopla na lox eburu i mi levente bulumaxao; limixin diba lok kaka mene i la dina lu xepe nga min.

Laradi do i ruuna lubaalung ting tonga na levelinga, i lox avukat kusu neni nang tonga i.”